Adwa naku palang dekada mabye kening yatu.
Makasawa at makapagal rin pala
ing lalakad king kalbaryu naning bie.
Impyernu, ing mundu na iti.
Ita ing ipagtantu ku keng
adwang dekada a pamangisnawa ku.
Mangisnawa ku pa pero sapak a pasakit
ing maka adya sumubuk king pamagkatau ku,
lalawen kung anggang nokarin ku.
Sapak a problema,
responsibilidad ing atyu kareng pago.
Manenaya na arapan ku.
Inarap ku no reng alwa.
Ing tutu na nini,
sinawa at mapagal na ku.
Makapagal at makasawa pala ing kakabie keni.
Bisa nakung magpaynawa at mattud namu.
Kalingwan ku namu ing egana-gana.
Mamag-asa ku na ing egana-gana kalingwan da na ku.
Aburen na naku at magdatun naku mu
keng inapag a pagkeran ning yatu para kaku.
Pero dahil kareng tau a makapalibut kaku,
migising ku keng pamanudtud ku.
Susuporta at lulugud andiyang pakanini ku mu.
Ala kung meging dahilan para e magpatuluy keng lakad
dahil atyu kayu keng gulut ku.
Manulak at manyabing agyu ku pa pag susuku naku.
Eku sinuku king egana-ganang pagsubuk
a binye ning mundu dahil keka yu.
Alang meging masakit, alang mabayat.
Mabayat a pasakit a pinatung da kaku
a dala ke dahil atyu kayu keng siping ku
meki bwot keng dadalan ku.
Mamamin ku na mayna ku mu.
Ala kung silbi pero madakal ku pala agawa
kung atyu kayu.
Tutu na impyeru ya ining yatu pero
kung ikayu ing kayantabe, langit.
Langit ya.
Ing yaku ay meging yang yaku dahil
kareng ambag yu keng pamagkatau ku.
Tune kung asabi na alwa yaku ini kung ala ka yu.
Madakal a salamat,
ala kung apagmaragul kening yatu
kung ali ikayu mu.
Kinumpletu yu ku
at kukumpletwan yu pa.
Madakal a salamat at ituluy taya ing pamaglakad kening yatu.
